VOV4.Êđê- Aguah mbruê 17/1, ti ƀuôn prŏng Đà Nẵng, êpul gĭt gai mkŏ mjing hdră mkăp “Hdră êlan mkŏ mjing leh anăn bi kluôm ênŭm ala čar yang ƀuôn ngă phŭn Việt Nam truh thŭn 2030, hdră tă truh thŭn 2045” mkŏ mjing leh klei kƀĭn trông hŏng akŏ “Lŏ dơ̆ng mtrŭt mđĭ, mđĭ hĭn boh tŭ dưn hlăm klei mlih mrâo klei bhiăn djŏ hŏng hnơ̆ng čoh čuăn mkŏ mjing leh anăn bi kluôm ênŭm ala čar yang ƀuôn ngă phŭn Việt Nam truh ti thŭn 2030, hdră tă truh thŭn 2045”. Khua lăn čar Nguyễn Xuân Phúc, khua êpul gĭt gai mkŏ mjing hdră mkăp gĭt gai klei kƀĭn trông anei. Blŭ hlăm klei kƀĭn trông, Khua lăn čar Nguyễn Xuân Phúc yap yuôm bhăn phung bi ala mâo klei blŭ jih ai tiê, bi klă mngač dŭm boh klei čiăng mgaih msir hlăm hdră mlih mrâo, sa hlăm dŭm boh klei kñăm mơ̆ng hdră mkăp anei. Sa ai hŏng klei phung bi ala blŭ, Khua lăn čar lač, hlăm wưng bi mguôp tar rŏng lăn, ñŭ kma hŏng tar rŏng lăn, bruă duh mkra mrô, yang ƀuôn mrô leh anăn dŭm klei hmăi êlam mơ̆ng gưl bruă tuh tia tal 4 truh kơ djăp mta bruă hlăm klei hdĭp yang ƀuôn, klei čiăng mjêč jing lŏ ngă klei mlih mrâo klei bhiăn ala čar Việt Nam.

Pô mblang: Y-Khem Niê