VOV4.Êđê - Aguah mbruê 17/3, ti ƀuôn prŏng Hồ Chí Minh, Khua lăn čar Nguyễn Xuân Phúc gĭt gai leh klei kƀĭn trông ala čar gưl tal 3 kơ bruă mkŏ mjing ala čar yang ƀuôn ngă phŭn. Klei kƀĭn trông mâo akŏ: “Dŭm boh klei mrâo, klei êdah êdi hlăm bruă mkŏ mjing leh anăn bi kluôm ênŭm ala čar yang ƀuôn ngă phŭn Việt Nam truh ti thŭn 2030 , hdră tă truh thŭn 2045”.

Leh sa hruê mđing hmư̆, bi trông, hmư̆ dŭm klei blŭ hlăm klei kƀĭn, Khua lăn čar Nguyễn Xuân Phúc lač klă, boh tŭ 3 klei kƀĭn ala čar kơ bruă anei mâo klei yuôm bhăn êdi, bi klă klei tŭ jing êjai ba hlăm boh sĭt hŏng ênoh klei hâo hưn lu êdi, mâo klei yuôm bhăn čiăng hrŏng ruah, ba hlăm mta phŭn mơ̆ng dŭm hdră mkăp hdră mtrŭn gưl dlông. Khua lăn čar mñă klă, Hdră mkăp “hdră êlan mkŏ mjing leh anăn bi kluôm ênŭm ala čar yang ƀuôn ngă phŭn Việt Nam truh ti thŭn 2030, hdră tă truh thŭn 2045” jing yuôm bhăn snăk. Anei jing mmông găl, mkŏ mjing knhuang êdah êdi hlăm klei mlih mrâo bruă kđi čar, mâo ênŭm hnơ̆ng čoh čuăn mđĭ kyar bruă duh mkra, mnia mblei yang ƀuôn ngă phŭn leh anăn ñu kma hŏng tar rŏng lăn.

Y-Bel pô mblang