VOV4.Êđê- Ti anăp klei rŭng lăn ti Ukraine, bruă răng mgang mnuih ƀuôn sang ti Ukraine mâo klei uêñ mĭn hĭn mơ̆ng Đảng leh anăn knŭk kna. Tlam mbruê 6/3, ti sang bruă Khua lăn čar, Khua lăn čar Nguyễn Xuân Phúc hmư̆ leh phŭn bruă hŏng tač êngao leh anăn dŭm anôk bruă djŏ tuôm hưn mdah kơ boh klei anei. Hluê si klei hâo hưn mơ̆ng phŭn bruă hŏng tač êngao, ară anei ti Ukraine mâo 7.000 čô mnuih ƀuôn sang Việt Nam. Lu mnuih čŏng kbiă đuê̆ leh mơ̆ng anôk mâo klei bi blah truh ti anôk êđăp ênang msĕ hŏng dŭm ala čar riêng gah jing Poland, Hungary, Bulgaria. Phŭn bruă hŏng tač êngao mâo leh klei mă bruă hŏng dŭm anôk bruă djŏ tuôm mơ̆ng Russia leh anăn Ukraine, Êpul hgŭm lu ala čar leh anăn dŭm ala čar mâo mnuih ƀuôn sang Việt Nam đuê̆ kdê rơ̆ng êlan êđăp ênang leh anăn mâo klei đru mnơ̆ng ƀơ̆ng huă leh truh anôk dôk kdê. Hlăm mmông mă bruă, Khua lăn čar mñă klă, srăng ngă jăk bruă răng mgang mnuih ƀuôn sang, amâo dưi brei mnuih ƀuôn sang Việt Nam djiê, êka keh ti Ukraine. Khua lăn čar pah mni knŭk kna mâo leh hdră êlan mkŏ mjing dŭm gưl phiơr amâo mă prăk kơ phung mâo klei dleh dlan mâo klei čiăng wĭt kơ ala čar, mbĭt anăn mtă hlăm klei ngă bruă anăn, čiăng hluê ngă djŏ hdră bhiăn, tal êlâo hĭn jing phung mniê, hđeh lăk, mnuih mduôn khua.

Pô mblang: Y-Ƀel Êban