VOV4.Êđê- Êpul gĭt gai mkŏ mjing hdră mkăp “Ksiêm wĭt 10 thŭn hluê ngă hdră mtrŭn gưl dlông 8 gưl 11 kơ hdră êlan răng mgang ala čar hlăm wưng mrâo” mrâo mâo klei bi kƀĭn hŏng pô bi ala knơ̆ng gĭt gai lĭng kahan gưl dlông, anôk bruă thơ̆ng kơ bruă mơ̆ng êpul gĭt gai leh anăn pô bi ala êpul čih mkra, êpul đru bruă kơ êpul gĭt gai. Khua lăn čar Nguyễn Xuân Phúc, khua hlăm bruă kđi čar, khua êpul gĭt gai mkŏ mjing hdră mkăp gĭt gai klei kƀĭn anei. Blŭ hlăm klei kƀĭn, Khua lăn čar Nguyễn Xuân Phúc mñă klă bruă kƀĭn ksiêm wĭt hdră mtrŭn gưl dlông 8 kơ hdră êlan răng mgang ala čar hlăm ênŭm mrâo jing yuôm bhăn sơnăk. Kyuanăn, hdră mkăp gưl dlông jing klă klơ̆ng, klă mngač leh anăn dlăng kluôm ênŭm boh tŭ hluê ngă hdră mtrŭn, mbĭt anăn ktrâo klă dŭm klei êdah, klei kpăk, klei awăt, phŭn gha, bruă klam leh anăn dŭm klei hriăm. Mbĭt anăn bi klă dŭm hdră tă, mta kñăm, hdră êlan răng mgang ala čar hlăm ênuk mrâo.

Pô mblang: Y-Ƀel Êban