VOV4.Êđê - Hlăm klei nao čuă gưl ala čar truh ti Singapore, hruê mbruê 25/2, Khua lăn čar Nguyễn Xuân Phúc bi tuôm leh hŏng phung khua gĭt gai dŭm êpul grŭp êdah êdi ti Singapore hlăm bruă pui kmlă, mđĭ kyar ƀuôn prŏng, mnia mblei lăn, bruă mkŏ mkra anôk bruă tuh tia. Bi tuôm hŏng khua gĭt gai êpul grŭp Kappel, Khua lăn čar Nguyễn Xuân Phúc yap yuôm bhăn kyua êpul grŭp duh bi liê leh kơ Việt Nam hlăm hruê mmông êgao, lŏ mñă kơ êpul grŭp srăng duh bi liê kơ Việt Nam hlăm dŭm mta bruă msĕ si pui kmlă doh, bruă mkŏ mkra leh anăn ƀuôn prŏng thâo mĭn. Bi tuôm hŏng khua gĭt gai dŭm êpul grŭp êdah kdlưn ti Singapore, Khua lăn čar mñă klă: Việt Nam dôk mtrŭt mđĭ dŭm knơ̆ng bruă mơ̆ng Singapore duh bi liê kơ ala čar Việt Nam hlăm dŭm mta bruă msĕ si bruă mkŏ mkra, pui kmlă, bruă tuh tia mkra mjing, bruă lŏ hma hnơ̆ng tŭ jăk, bruă hâo hưn, ƀuôn prŏng thâo mĭn, bruă ngăn prăk, knơ̆ng bruă ngăn prăk. Khua lăn čar mñă kơ êpul hgŭm dŭm knơ̆ng bruă Singapore lŏ dơ̆ng jing kdrông mtrŭt mđĭ knơ̆ng bruă Singapore duh bi liê kơ Việt Nam, đru kơ klei bi mguôp 2 ala čar jing hnơ̆ng mrâo.

Y-Bel pô mblang