VOV4.Êđê- Tlam mbrue (12/8), ti Hà Nội, Phŭn bruă kahan ksiêm mkŏ mjing leh knăm bi mklă kơ phung khua kahan nao ngă bruă răng mgang klei êđăp ênang hŏng Êpul hgŭm lu ala čar, lehanăn bi mklă bruă mkŏ mjing adŭ bruă dôk hlăm Phŭn bruă kahan ksiêm kơ bruă răng mgang klei êđăp ênang hŏng Êpul hgŭm lu ala čar. Hlue ngă hdră êlan mđĭ hĭn klei ñu kma hŏng ala tač êngao, lehanăn bi mguôp hlăm bruă răng mgang klei êđăp ênang, hrue 15/6/2021, Khua phŭn bruă kahan ksiêm bi klă leh bruă mkŏ mjing adŭ bruă răng mgang klei êđăp ênang hŏng Êpul hgŭm lu ala čar dôk ti gŭ klei kiă kriê mơ̆ng Phŭn bruă kahan ksiêm. Leh mâo mkŏ mjing adŭ bruă anei, adŭ bruă anei hgŭm leh hŏng êpul hgŭm lu ala čar mkŏ mjing kơ 23 čô khua kahan mâo mjuăt bi hriăm dưi nao đru hlăm dŭm bruă răng mgang klei êđăp ênang mơ̆ng Êpul hgŭm lu ala čar. Truh kơ ară anei, Phŭn bruă kahan ksiêm mâo leh 8 čô khua kahan mâo Êpul hgŭm lu ala čar tŭ yap, djăp ênoh čuăn bi hgŭm hŏng êpul răng mgang klei êđăp ênang. Blŭ hrăm hlăm knăm anei, Khua lăn čar Nguyễn Xuân Phúc lač, bruă tiŏ nao êpul đru hlăm êpul răng mgang klei êđăp ênang mơ̆ng Êpul hgŭm lu ala čar jing sa bruă yuôm bhăn, kñăm bi sĭt klei ƀuăn, bruă klam mơ̆ng knŭk kna Việt Nam hŏng tač êngao bi răng mgang klei êđăp ênang dlông rŏng lăn. Wưng anei, Khua lăn čar Nguyễn Xuân Phúc jao leh klei bi mklă kơ Trung tá Nguyễn Ngọc Hải mă bruă ti anôk bruă Êpul hgŭm lu ala čar, lehanăn mđup brei mnga kơ 3 čô nao ngă bruă ti ala čar Sudan./.

Pô mblang: Y-Khem Niê