VOV4.Êđê - Aguah mbruê 15/6, Khua lăn čar Nguyễn Xuân Phúc gĭt gai leh mmông mă bruă hŏng bruă Đảng čar Quảng Bình. Leh hmư̆ klei hưn mdah mơ̆ng dŭm phŭn, dhar bruă, klei blŭ bi êdah hlăm mmông mă bruă, Khua lăn čar Nguyễn Xuân Phúc mñă klă, hruê mmông êgao, bruă Đảng čar, bruă sang čư êa leh anăn mnuih ƀuôn sang čar Quảng Bình dưi bi lar leh knhuah gru klei bi mguôp, hluê ngă jăk hdră mtrŭn klei kƀĭn bruă Đảng čar tal 17, gĭr ktưn atăt čar pô hŏng hdră ngă bruă klă klơ̆ng. Čar Quảng Bình mâo ênŭm klei găl đĭ kyar msĕ si: tač êdeh phiơr, kdrŭn ksĭ, mâo mnơ̆ng kriê pioh wăl hdĭp mda tar rŏng lăn, mâo knông lăn, čiăng mâo hdră tă sui hlăm klei đĭ kyar.

Hlăm klei đĭ kyar bruă duh mkra ala ƀuôn, Khua lăn čar Nguyễn Xuân Phúc lač, čar čiăng kñăm kơ 4 kmeh gơ̆ng jing bruă hiu čhưn ênguê, bruă lŏ hma thâo mĭn, mđĭ kyar bruă duh tia leh anăn mđĭ kyar kjăp bruă duh mkra êa ksĭ. Hlăm anăn, mđing hĭn jing mnuih ƀuôn sang hlăm čar lu jing hdĭp ti alŭ wăl ngă bruă lŏ hma, krĭng ƀuôn sang.

Y-Ƀel pô mblang