VOV4.Êđê - Aguah mbruê 3/6, ti sang bruă Khua lăn čar, Khua lăn čar Nguyễn Xuân Phúc mă bruă hŏng Êpul phung kreh knhâo hƀuê ênuk Việt Nam. Bi ala kơ Đảng, knŭk kna, Khua lăn čar Nguyễn Xuân Phúc pah mni, bi mni, tŭ yap phung thơ̆ng kơ bruă, phung kreh knhâo, phung ksiêm duah hƀuê ênuk ala čar – phung đru mguôp leh anăn dôk bi mguôp klei thâo, klei mĭn kơ klei đĭ kyar bruă kreh knhâo hƀuê ênuk leh anăn wăt kơ bruă mkŏ mjing leh anăn rang mgang ala čar.

Blŭ hlăm mmông mă bruă, hlăm hruê mmông kơ anăp, Khua lăn čar hmăng hmưi êpul kreh knhâo hƀuê ênuk Việt Nam amâo djŏ knŏng ksiêm duah leh anăn kñăm kơ hƀuê ênuk Việt Nam, ƀiădah lŏ ksiêm duah, thâo klă hƀuê ênuk alŭ wăl leh anăn tar rŏng lăn. Khua lăn čar hmăng hmưi phung ksiêm duah hƀuê ênuk Việt Nam jing phung ênuah ênô, mă dŭm mta phŭn hlăm hƀuê ênuk jing klei djŏ, kpăt mă dŭm klei yuôm bhăn mơ̆ng hƀuê ênuk leh anăn hdră tă ênuk mrâo, khăp kơ klei êđăp ênang, răng mgang klei djŏ, jih ai đru mguôp kơ ala čar, amâo mâo knŏng jing pô čih ƀiădah lŏ kđăm tur pô hlăm hƀuê ênuk mkŏ mjing leh anăn răng mgang ala čar Việt Nam wưng Hồ Chí Minh.

Y-Ƀel  pô mblang