VOV4.Êđê- Lŏ dơ̆ng klei mă bruă ti čar Quảng Ngãi, Khua lăn čar Nguyễn Xuân Phúc mâo leh klei mă bruă hŏng êpul khua bruă Đảng čar Quảng Ngãi. Blŭ gĭt gai hlăm klei mă bruă, Khua lăn čar Nguyễn Xuân Phúc lač, hlăm wưng dleh dlan msĕ thŭn mrâo êgao, ƀiădah bruă sang čư êa leh anăn mnuih ƀuôn sang ti čar Quảng Ngãi mâo nanao bi mguôp, sa ai tui ngă dŭm hdră êlan djŏ guôp čiăng mđĭ kyar bruă duh mkra – ala ƀuôn, mgaih msir dŭm klei adôk mâo, tui duah hdră ngă bruă, klei bi hmô mđĭ kyar mâo boh tŭ dưn.

Dŭm klei tŭ jing hlăm thŭn 2021 jing tur knơ̆ng đĭ kyar yuôm bhăn hŏng čar Quảng Ngãi hlăm hruê mmông kơ anăp. Hruê mmông kơ anăp, Khua lăn čar mtă kơ bruă Đảng čar, bruă sang čư êa leh anăn mnuih ƀuôn sang čar Quảng Ngãi lŏ bi lar hĭn knhuah gru bruă cách mạng, dưn yua klei găl kluôm ênŭm čiăng mtrŭt mđĭ klei đĭ kyar. Čar Quảng Ngãi čiăng ksiêm dlăng kluôm ênŭm hŏng hnơ̆ng tŭ jăk leh anăn hdră tă sui truh kơ thŭn 2050, anôk bruă duh mkra Dung Quất Quảng Ngãi đru mguôp mđĭ kyar bruă duh mkra kjăp.

Pô mblang: Y-Ƀel Êban