VOV4.Êđê - Tlam hruê 21/6, Khua lăn čar Nguyễn Xuân Phúc mbĭt hŏng Êpul bi ala anôk bruă kƀĭn ala ƀuôn prŏng Hồ Chí Minh bi tuôm hŏng mnuih ƀuôn sang jing Khua hlăm dhar bruă mặt trận ƀuôn prŏng, phung hriăm lu, phung khua kiă kriê klei đăo, mnuih mâo k’hưm, êdah êdi hlăm êpul êya mnuih ƀuôn sang djuê ƀiă, phung văn nghệ sỹ ti ƀuôn prŏng Hồ Chí Minh. Mđing hmư̆ klei blŭ mơ̆ng mnuih ƀuôn sang, Khua lăn čar Nguyễn Xuân Phúc ƀuh phung bi ala mnuih ƀuôn sang lač leh kơ lu bruă yuôm bhăn mơ̆ng ƀuôn prŏng Hồ Chí Minh lehanăn ala čar, mâo wăt bruă klei đăo, bruă mjuăt bi hriăm, hdră duh mkra, dhar kreh, wăl hdĭp mda, gang mkhư̆ klei ƀơ̆ng ngăn… Tĭng dlăng dŭm klei blŭ hŏng jih ai tiê mơ̆ng mnuih ƀuôn sang, Khua lăn čar Nguyễn Xuân Phúc lač klă, mta kñăm 2045 ba lăn čar drei jing lăn čar đĭ kyar mâo hnư hrui wĭt lu jing sa klei lông dlăng prŏng, dôk čiăng klei hgŭm kngan, đru mguôp mơ̆ng kluôm yang ƀuôn, mơ̆ng phung hriăm lu, phung văn nghệ sĩ, phung khua kiă kriê klei đăo lehanăn jih jang djuê ana Việt Nam. Khua lăn čar mñă, grăp blư̆ lăn čar tuôm hŏng klei dleh dlan, klei đru mguôp mơ̆ng “Phung thâo lu” mâo boh tŭ yuôm êdi./.

H’ Nêč pô mblang