VOV4.Êđê - Mmăt hruê 8/5, ti Sang mmuñ prŏng Hà Nội, Êpul hgŭm bruă Văn học Nghệ thuật Việt Nam lehanăn Êpul hgŭm phung čih klei duê Việt Nam mkŏ mjing leh Knăm mđup brei Medai hnŭk êngiê mrô dua kơ Pô čih klei duê Hữu Thỉnh lehanăn Hdră kdŏ mmuñ “Pô čih klei duê Hữu Thỉnh – Klei kjăp ktang mơ̆ng lăn”. Khua lăn čar Nguyễn Xuân Phúc nao ti knăm anei lehanăn mđup brei Medai hnŭk êngiê mrô dua kơ Pô čih klei duê Hữu Thỉnh. Pô čih klei duê Hữu Thỉnh kkiêng thŭn 1942, anăn amĭ kkiêng Nguyễn Hữu Thỉnh, bút danh Vũ Hữu, jing pô čih klei duê, klei yăl dliê, mnuih hgŭm hlăm Êpul hgŭm phung čih klei yăl dliê Việt Nam mơ̆ng thŭn 1976, Khua čih hră lehanăn Khua kiă kriê Êpul hgŭm phung čih klei yăl dliê Việt Nam (4 wưng păn bruă đrông). Ñu ăt jing Pô bi ala anôk bruă kƀĭn ala gưl X lehanăn XI. Klei pah mni yuôm bhăn tal anei srăng đru kơ ñu lŏ mâo boh kdrŭt gĭr ktưn hĭn čiăng kơ Hữu Thỉnh lŏ đru mguôp lu hĭn, mbĭt anăn bi mni kơ dŭm boh tŭ yuôm bruă văn học nghệ thuật mâo phung čih klei duê ba myơr leh kơ hdră bruă văn học ala čar hlăm êbeh 60 thŭn êgao./.

H’Nêč pô mblang