VOV4.Êđê- Ƀri hrue hđeh êlăk dlông rŏng lăn aguah mbrue (31/5), Khua lăn čar Nguyễn Xuân Phúc nao čuă mđĭ ai lehanăn mđup brei leh mnơ̆ng kơ hđeh amâo mâo jăk asei mlei ti Anôk rông ba hđeh amâo mâo jăk asei mlei ti Hà Nội, (wăl krah Chúc Sơn, kdriêk Chương Mỹ). Mơĭt asăp hơêč hmưi jăk siam truh hŏng phung hđeh ƀri hrue phung hđeh êlăk tar rŏng lăn, Khua lăn čar Nguyễn Xuân Phúc čih pioh, bi myuôm ai tiê phung nai, mnuih ngă bruă anôk rông ba hđeh êlăk, hur har, jih ai tiê leh mâo bruă klam hŏng klei khăp amâo mâo knhal, bi dlăng kriê, rông ba phung hđeh amâo mâo jăk asei mlei, mtô bi hriăm kơ digơ̆ hră mơar, kơ knhuah hdĭp, kčĕ kơ klei duah ƀơ̆ng.

 Bi klă Đảng, Knŭk kna mđing nanao kơ phung hđeh, hlăm anăn mâo phung hđeh amâo mâo jăk asei mlei. Khua lăn čar bi êdah klă bruă dlăng kriê, rông ba phung hđeh brei mâo klei bi sa ai, mâo klei đua klam, hŏng ai tiê klei khăp mơ̆ng jih jang yang ƀuôn. Ƀri wưng anei, Khua lăn čar mđup brei kp anôk rông ba hđeh amâo mâo jăk asei mlei ti Hà Nội 100 êklăk prăk, lehanăn iêo mthưr jih jang yang ƀuôn mđup brei kơ anôk rông ba hđeh anei blei mprăp mnơ̆ng mnuă yua, mtô bi hriăm hđeh hŏng ênoh truh 200 êklăk prăk./.

Pô mblang: Y-Khem Niê