VOV4.Êđê- Tlam mbrue (23/1), Khua lăn čar Nguyễn Xuân Phúc nao čuă lehanăn mă bruă hŏng Êpul bi ala Bruă kƀĭn ala ƀuôn prŏng Hồ Chí Minh. Blŭ hrăm ti anei, Khua lăn čar Nguyễn Xuân Phúc mtă kơ êpul bi ala Bruă kƀĭn ala ƀuôn prŏng brei mâo bruă ƀuah ăl ktang ya mta bruă ngă kơ lu mnuih ƀuah ăl, ngă soh hŏng hdra bhiăn prŏng êdi hlăm alŭ wăl, boh nik dŭm klei soh hŏng knhuah dôk dơ̆ng ƀơ̆ng huă, ngă jhat kơ phung hđeh hlăm wưng leh êgao. Khua lăn čar ăt mtă kơ Êpul bi ala bruă kƀĭn ala ƀuôn prŏng mđing uêñ, tui ksiêm bruă duh mkra ala ƀuôn, bi leh klei bhiăn, boh nik dŭm klei soh tlĕ čhĭ cổ phiếu, bi tlĕ čhĭ lăn soh hŏng klei bhiăn wưng leh êgao.

Khua lăn čar ăt mta kơ dŭm Êpul bi ala Bruă kƀĭn ala ƀuôn prŏn Hồ Chí Minh păn kjăp hdră êlan mơ̆ng Đảng, hdră bhiăn knŭk kna, mđĭ hĭn bruă klam ti anăp Đảng, ti anăp phung ƀuôn sang, amâo mâo mdei dưi mđĭ hĭn klei kjăp bruă kđi čar, bi leh klei bhiăn mă bruă, hdră bhiăn knŭk kna amâo mâo lĕ hlăm klei duah mčhua, amâo mâo mĭn čhuai, ba wĭt klei tŭ dưn klă sĭt./.

Pô mblang: Y-Khem Niê