VOV4.Êđê- Lŏ dơ̆ng hlăm klei bi kƀĭn tal 3, Bruă kƀĭn ala gưl 15, hrue mbrue (25/5), trông čhai hlăm êpul kơ bruă duh mkra ala ƀuôn lehanăn ngăn prăk knŭk kna hlăm dŭm mlan akŏ thŭn 2020, phung bi ala bi myuôm dŭm klei knŭk kna gĭr kơrŭ wĭt bruă duh mkra wưng leh êgao. Lu phung bi ala sa ai hŏng klei knŭk kna hâo mdah hŏng bruă kƀĭn ala, boh tŭ dưn anei jing klei bi klin mơ̆ng jih jang klei gĭr, jih ai tiê mă bruă amâo mâo mdei hlăm wưng leh êgao. GDP hlăm 3 mlan akŏ thŭn hlăm brô 5,03%. Klei duh mkra kluôm hơĭt, jih jang djăp mta bruă lŏ wĭt msĕ si aguah tlam. Siămdah, phung bi ala dôk hyưt jing kơ klei ênoh êa săng, êa pui đĭ, srăng hmăi amâo mâo jăk kơ ênoh ênil mnơ̆ng dhơ̆ng čhĭ mnia, mnơ̆ng duh kơ bruă, ênoh klei dŭ mdiăng. Tơdah amâo mâo dưi kiă kriê ôh ênoh êa săng êa pui snăn srăng jing msĕ si domino mtam klei đĭ ênoh jih jang mnơ̆ng mkăn. Ti êpul trông čhai, Khua lăn čar Nguyễn Xuân Phúc mñă kơ grăp čô knuă druh jing khua kiă kriê, lehanăn phung bi ala bruă kƀĭn ala brei mâo klei răng, kyuadah ti anăp adôk lu klei dleh dlan. Mđĭng kơ ênoh duh bi liê bruă duh mkra, duh kơ bruă kluôm bi jăk hĭn, nao hlăm klei hdĭp čiăng pral dưi đru phung ƀuôn sang lehanăn phung duh mkra, msĕ hŏng hdră mơ̆ng Đảng, knŭk kna tă leh. Khua lăn čar Nguyễn Xuân Phúc păn kjăp hŏng akŏ klei čiăng mtă jing “Đăm lui ôh klei prăk luič ênoh bi mngăt hĕ mnuih ƀun”./.

Pô mblang: Y-Khem Niê