VOV4.Êđê - Aguah mbruê 3/8, Khua lăn čar Nguyễn Xuân Phúc, Khua êpul gĭt gai klei bhiăn gưl dlông mâo leh klei nao čuă leh anăn ksiêm dlăng bruă phưi tha phung mnă thŭn 2022 ti sang mnă Xuân Lộc (anôk bruă C10, Phŭn bruă kahan ksiêm), kdriêk Xuân Lộc, čar Đồng Nai.

Hlăm mmông mă bruă, Khua lăn čar Nguyễn Xuân Phúc mtă hlăm 1 mlan kơ anăp, dŭm sang mnă, anôk krư̆ kđăl leh anăn anôk bruă bi mjuăt hlăm kluôm ala lŏ wĭt ksiêm dlăng čiăng rơ̆ng amâo lui kơ sa čô mnă mâo ênŭm klei găl leh anăn amâo brei phung amâo mâo ênŭm klei găl dưi bi klă phưi tha hlăm gưl anei. Khua lăn čar mtă kơ Êpul gơ̆ng đru kčĕ bruă phưi phung mnă hluê ngă jăk klei bhiăn phưi mnă, hŏng hnơ̆ng čoh čuăn amâo dưi brei mâo klei soh, amâodah sa mta bruă amâo mâo jăk, tơdah mâo klei hưn mdah srăng ksiêm dlăng klă kñăm amâo mâo klei hmăi amâo jăk kơ hdră êlan prŏng anei mơ̆ng Đảng, knŭk kna. Dŭm alŭ wăl mprăp ênŭm klei găl čiăng kơ phung mnă phưi hlăm gưl anei dưi ñŭ kma hŏng yang ƀuôn.

Y-Ƀel pô mblang