VOV4.Êđê - Bri wưng bi hdơr 47 thŭn hruê sua wĭt klei êngiê krĭng kwar Dhŭng, hluh hlih ala čar, 68 thŭn hruê klei dưi hƀuê ênuk Điện Biên Phủ, tlam mbruê 27/4, Khua hlăm bruă kđi čar, Khua lăn čar Nguyễn Xuân Phúc, khua kiă kriê êpul gơ̆ng bruă lĭng kahan leh anăn klei êđăp ênang ala čar mâo leh klei nao čuă leh anăn mă bruă hŏng anôk bruă klei êđăp ênang ala čar.

Blŭ hlăm mmông mă bruă, Khua lăn čar Nguyễn Xuân Phúc mñă klă, hlăm klei krŭ kdơ̆ng mơ̆ng lĭng kahan leh anăn mnuih ƀuôn sang drei hlăk yan mnga thŭn 1975, êpul êya krŭ kdơ̆ng krĭng kwar Dhŭng, hlăm anăn mâo êpul êya răng mrang klei êđăp ênang ala čar nao hgŭm hŏng klei jhŏng ktang hlăm dŭm anôk bi blah, kđông knŭk kna hdăp, bi rai jih klei lŏ kgŭ mơ̆ng diñu, hmar mâo mă klei dưi kiă kriê dŭm krĭng kñăm dưi mbha leh, đru bi rai klei bi blah leh anăn klei kpĭ mơ̆ng Mi – knŭk kna hđăp, mbĭt hŏng lĭng kahan leh anăn mnuih ƀuôn sang drei dưi sua wĭt klei êngiê krĭng kwar Dhŭng hluh hlir ala čar. Bơ̆k bâo hlăm hruê mmông kơ anăp, Khua lăn čar mtă kơ anôk bruă klei êđăp ênang ala čar lŏ dơ̆ng hyuă kjăp klei gĭt gai, ktrâo lač kluôm ênŭm mơ̆ng Đảng hlăm klei ngă bruă klam răng mgang klei êđăp ênang ala čar.

Y-Ƀel pô mblang