VOV4.Êđê - Ƀri hlăm wưng mprăp drông tết nguyên đán Nhâm Dần,Khua lăn čar Nguyễn Xuân Phúc bi ala kơ phungkhua kiă kriê Đảng, lăn čar nao čuă lehanăn mđup brei mnơ̆ng kơ phung nai aê mdrao, mđĭ ai digơ̆ ti dŭm boh sang êa drao hlăm ƀuôn prŏng Đà Nẵng, anăn jing sang êa drao prŏng Đà Nẵng, lehanăn sang êa drao C Đà Nẵng, jing leh dŭm boh sang êa drao ngă jăk bruă mdroa mgŭn kơ mnuih ruă hlăm ƀuôn prŏng Đà Nẵng lehanăn mnuih ruă mơ̆ng dŭm čar Nghệ An hlŏng truh kơ dŭm čar Lăn Dap Kngư, lehanăn lŏ jing sang êa drao mdrao tŭ jing mnuih djŏ klei ruă tưp Covid 19. Bi mni kơ dŭm klei tŭ dưn sang êa drao mâo ngă leh, Khua lăn čar brei thâo ka bŏ mơh 20 hrue kơ anăp jing truh yơh hrue tết nguyên đán, Khua lăn čar čang hmăng kơ jih jang phung nai aê mdrao dưi yua jih bruă knuă leh mâo ngă, lŏ dơ̆ng ktưn bi jing sang êa drao knơ̆ng hlăm alŭ wăl đru mkă dlăng mdrao mgŭn dlăng kriê klei suaih pral phung ƀuôn sang. Khua lăn čar lŏ mđĭ ai čuă êmuh phung khua kiă kriê Đảng, bruă sang čư̆ êa lehanăn jih jang bruă sang êa drao ti Đà Nẵng, boh nik hŏng dŭm boh sang êa drao dôk mdrao mnuih ruă tưp Covid 19./.

Y-Khem pô mblang