VOV4.Êđê - Aguah mbruê 7/2, ti Hà Nam, Khua lăn čar Nguyễn Xuân Phúc nao hgŭm hlăm knăm pŏk kčưm hdră mkăp wưng tal 2 hlăm hdră mkăp duh bi liê mkŏ mkra êlan bat jơ̆ng mkŏ êlan dơ̆ng pral Hà Nội – Hải Phòng hŏng êlan dơ̆ng pral Cầu Giẽ- Ninh Bình. Hdră mkăp anei mâo ênoh prăk duh bi liê 702,82 êklai prăk, mâo boh taih 16,3 km mơ̆ng knơ̆ng bruă dŭ mdiăng hlăm êlan klông čar Hà Nam jing pô duh bi liê, pô ngă bruă jing knơ̆ng bruă mkŏ mkra Xuân Trường. Hruê mmông bi leh hdră anei ti thŭn 2023.

Blŭ hlăm knăm anăn, Khua lăn čar Nguyễn Xuân Phúc mñă ktang kơ klei yuôm bhăn mơ̆ng êlan dơ̆ng pral anei srăng đru bi hrŏ klei kpăk hlăm êlan klông kơ alŭ wăl ƀuôn prŏng Hà Nội leh anăn mđĭ hnơ̆ng tŭ dưn klei mkŏ êlan klông, iêo mthưr klei duh bi liê leh anăn pŏk phai, mđĭ kyar anôk mnia mblei, hiu čhưn ênguê, wăl ƀuôn prŏng ti alŭ wăl dap mnai krĭng dưr. Khua lăn čar mtă kơ phŭn bruă dŭ mdiăng hlăm êlan klông, čar Hà Nam, pô duh bi liê, phung ngă bruă čiăng bi klă bruă klam pô hŏng hdră mkăp anei, ngă djŏ hruê mmông, rơ̆ng hnơ̆ng tŭ jăk leh anăn boh tŭ dưn klei ngă bruă, gang mkhư̆ klei ƀơ̆ng ngăn, klei amâo jăk hlăm klei duh bi liê.

Y-Ƀel pô mblang