VOV4.Êđê - Hlăm ai êwa mơak mñai dŭm hruê akŏ yan mnga mrâo, bi hdơr 92 thŭn hruê mkŏ mjing Đảng, Khua lăn čar Nguyễn Xuân Phúc nao hgŭm leh anăn blŭ hlăm hruê knăm “Yan mnga hlăm djăp krĭng kwar ala čar” thŭn 2022. Blŭ hlăm hruê knăm anăn, Khua lăn čar Nguyễn Xuân Phúc lŏ bơ̆k bâo klei mtă mtăn mơ̆ng khua gĭt gai Hồ Chí Minh: “Mnuih ƀuôn sang jing Yuăn amâodah Thổ, Mương amâodah Man, Jarai amâodah Êđê, Sơdang amâodah Bahnar leh anăn dŭm djuê ana mnuih djuê ƀiă mkăn, jing anak čô Việt Nam, jing ayŏng amai adei sa amĭ. Drei djiê hdĭp mâo mbĭt, knap mbĭt, trei mbĭt” leh anăn mñă klă: Knhuah gru jăk siam djuê ana Việt Nam dưi mkŏ mjing mơ̆ng 54 djuê ana bi mguôp hdơ̆ng pô. Anăn jing knuah gru siam, lu jơr leh anăn mâo klei bi mguôp hlăm boh blŭ, jing ngăn drăp yuôm bhăn djuê ana drei. Mpŭ kơ djuê ana, êlâo hĭn jing mpŭ kơ knhuah dhar kreh mơ̆ng djuê ana anăn. Hdră êlan djuê ana mơ̆ng Đảng mkŏ mjing djăp klei găl kơ bruă kriê pioh leh anăn mđĭ kyar dŭm klei mdê hlăm knhuah gru dhar kreh grăp djuê ana, mbĭt anăn ngă kơ knhuah gru dhar kreh dŭm djuê ana bi ñŭ kma mbĭt, mkŏ mjing dhar kreh Việt Nam kjăp leh anăn mngač.

Y-Ƀel pô mblang