VOV4.Êđê- Khua lăn čar Nguyễn Xuân Phúc mrâo nao hlăm hdră “Yan mnga trei mđaŏ - thŭn 2022” ti ƀuôn prŏng Thủ Đức, ƀuôn prŏng Hồ Chí Minh. Khua lăn čar Nguyễn Xuân Phúc hŏng êpul mă bruă mđup brei 900 hnư mnơ̆ng hơêč hmưi thŭn mrâo kơ phung hđeh êrĭt amĭ ama kyua Covid-19, êpul aê mdrao, knuă druh ƀuôn hgŭm, wăl ƀuôn prŏng hgŭm hlăm anôk gang mkhư̆ klei ruă tưp leh anăn mnuih mă bruă ti ƀuôn prŏng Thủ Đức.

Êpul hgŭm mnuih mă bruă Việt Nam leh anăn dŭm anôk bruă mnia blei ăt mâo hnư mnơ̆ng thŭn mrâo mơĭt kơ phung hđeh leh anăn phung mă bruă. Blŭ hrăm hlăm hdră, Khua lăn čar Nguyễn Xuân Phúc bi mni kơ bruă ƀuôn prŏng Hồ Chí Minh pral, mbruă, mâo lu hdră kriê dlăng Têt kơ mnuih ƀun, phung mâo klei hdĭp dleh dlan ti alŭ wăl hŏng ênoh prăk lu. Mbĭt anăn čang hmăng, leh gưl mdei Tết, phung mă bruă, mnuih mă bruă ti ƀuôn prŏng Hồ Chí Minh bi lông ktưn, ngă bruă mkra mjing.

Pô mblang: H’Zawut Ƀuôn Yă