VOV4.Êđê - Tlam mmăt mbruê 26/8, Khua lăn čar Nguyễn Xuân Phúc nao leh hlăm knăm nao sang hră mơar mơ̆ng sang hră gưl 1, gưl 2 leh anăn gưl 3 Hy Vọng – sang hră mtô mjuăt leh anăn bi hriăm phung hđeh êrĭt amĭ ama kyua klei ruă tưp Covid-19 ti Đà Nẵng. Hlăm hruê knăm, Khua lăn čar Nguyễn Xuân Phúc pah mni phung hđeh sang hră, khădah mrâo mŭt hriăm ƀiădah dưi găn jih klei dleh dlan, ênguôt hnĭng čiăng hrăm mbĭt hŏng phung nai mkŏ mjing hruê knăm nao sang hră bŏ hŏng klei tŭ dưn leh anăn mgei ai tiê.

Khua lăn čar mñă ktang hŏng phung ngă bruă klei mrâo, ala čar Việt Nam čih leh sa klei mmuñ kơ klei hdĭp Việt Nam, kơ klei gĭr ktưn jing tur knơ̆ng yuôm bhăn kčưm kơ klei hdĭp mâo lu klei mngač hĭn. Khua lăn čar đăo knang hŏng klei khăp leh anăn klei uêñ mĭn mơ̆ng yang ƀuôn, phung hđeh srăng mâo klei hơĭt hriăm hră mơar, đru mkŏ mjing ala čar, ƀuôn sang leh anăn hmăng hmưi phung hđeh êrĭt amĭ ama kyua klei ruă tưp Covid-19 hur har hriăm hră mơar, mjuăt pô čiăng jing mnuih tŭ jing kơ yang ƀuôn.

Y-Ƀel pô mblang