VOV4.Êđê- Aguah mbruê 28/8, ti ƀuôn prŏng Sầm Sơn, čar Thánh Hóa, Khua lăn čar Nguyễn Xuân Phúc nao hlăm knăm kčưm pŏk wăl kriê pioh mnuih ƀuôn sang, phung knuă druh, lĭng kahan leh anăn hđeh sang hră gưl prŏng krĭng kwar Dhŭng nao đru mblah ti krĭng kwar Dưr, knăm ba mdah klei bi klă mơ̆ng Khua knŭk kna tu yap ƀuôn prŏng Sầm Sơn bi leh bruă klam mkŏ mkra krĭng ƀuôn sang mrâo, knăm tŭ mă mêđai mă bruă mrô 3 mơ̆ng Khua lăn čar. Hluê si klei hưn mdah hlăm knăm anăn, mơ̆ng mlan 10 thŭn 1954 truh kơ mlan 5 thŭn 1955, ti să Quảng Tiến, ară anei jing ƀuôn hgŭm Quảng Tiến, ƀuôn prŏng Sầm Sơn, čar Thanh Hoá dưi mâo klei đăo knang jao tŭ drông êbeh 47.300 čô knuă druh, hđeh sang hră gưl prŏng leh anăn gŏ sang phung knuă druh ti Việt Nam nao đru.

Hluê klei klei hmăng hmưi mơ̆ng phung knuă druh hđăp, lĭng kahan hđăp, phung hđeh sang hră gưl prŏng nao đru, čar Thanh Hoá jao kơ ƀuôn prŏng Sầm Sơn mkăp brei lăn čiăng mkŏ mjing wăl kriê pioh anei. Blŭ hlăm knăm, Khua lăn čar Nguyễn Xuân Phúc yap yuôm bhăn čar Thanh Hoá, ƀuôn prŏng Sầm Sơn mâo leh klei mprăp jăk kơ wăl kriê pioh anei, mbĭt anăn mtă brei ngă bi djŏ mmông čiăng dưi ba yua djŏ wưng bi hdơr 70 hruê mnuih ƀuôn sang, knuă druh, lĭng kahan, hđeh sang hră gưl prŏng krĭng kwar dhŭng nao đru kơ krĭng kwar Dưr.

Pô mblang: Y-Ƀel Êban