VOV4.Êđê- Ƀri wưng bi hdơr 77 thŭn hruê krŭ kdơ̆ng mlan 8 leh anăn hruê mkŏ mjing ala čar 2/9, 53 thŭn hruê djiê Awa Hồ, lŏ dơ̆ng hdră ngă bruă ti Tuyên Quang, Aguah mbruê, Khua lăn čar Nguyễn Xuân Phúc ba anăp êpul ngă bruă hŏng klei mpŭ myơr brui mngưi, kwang mnga bi hdơr kơ khua gĭt gai Hồ Chí Minh ti Lán Nà Nưa, hlăm wăl ala čar kriê pioh Tân Trào. Ti anăp rup khua gĭt gai Hồ Chí Minh, Khua lăn čar Nguyễn Xuân Phúc leh anăn êpul mâo mmông bi hdơr kơ kơ Awa. Khua lăn čar bi êdah klei hdơr knga amâo mâo knhal kơ dŭm klei đru mguôp prŏng prĭn mơ̆ng Awa, sa čô khua gĭt gai, Sa čô nai mơ̆ng bruă krŭ kdơ̆ng, jih klei hdĭp săn asei kơ klei êngiê djuê ana, hluh hlir ala čar, kơ klei jăk mơai mnuih ƀuôn sang.

Leh anăn Khua lăn čar hŏng êpul ngă bruă nao myơr brui mngưi ti Đình Tân Trào, nah yŭ alŭ Tân Lập, să Tân Trào, jing anôk mkŏ mjing Quốc Dân Đại hội, phŭn agha bruă kƀĭn ala Việt Nam, hlăk hruê 16/8/1945. Quốc dân Đại hội Tân Trào jing sa gru kruăk hƀuê ênuk bruă krŭ kdơ̆ng Việt Nam, ngă klei krŭ kdơ̆ng hŏng klei hmar hĭn, čiăng kơ mnuih ƀuôn sang kluôm ala krŭ kdơ̆ng ngă phŭn klei hdĭp leh anăn lăn čar pô.

Ti sang dhar krah alŭ Tân Lập, să Tân Trào, Khua lăn čar Nguyễn Xuân Phúc mâo leh klei êmuh čuă, mđĭ ai phung hgŭm hlăm êpul bi mguôp Then Tân Lập, să tân Trào, kdriêk Sơn Dương, Khua lăn čar hmăng hmưi grăp čô hlăm êpul srăng thâo săng klă bruă klam kriê pioh, răng mgan, bi lar knhuah gru Then, mnơ̆ng kriê pioh amâo thâo buh hŏng ală mâo UNESCO čih yap leh.

Pô mblang: Y-Ƀel Êban