VOV4.Êđê - Ƀri bi hdơr 75 thŭn hrue kahan êka êkeh – phung êngiă asei (27/7/1947 – 27/7/2022) Aguah mbrue (26/7), Khua lăn čar Nguyễn Xuân Phúc nao leh ti anôk bi kƀĭn mpŭ mni kơ mnuih mâo bruă tŭ dưn hŏng cách mạng kdlưn hĭn hlăm kahan ksiêm yang ƀuôn wưng thŭn 2017 – 2022. Nao ti anôk bi kƀĭn anei mâo truh 461 čô phung bi ala kơ dŭm pluh êbâo čô kahan êka êkeh, găp djuê phung êngiă asei lehanăn mnuih mâo bruă tŭ dưn hŏng cách mạng tuôm ngă leh kahan ksiêm, lehanăn hlăk dôk ngă kahan ksiêm hlăm dŭm ênuk. Blŭ hrăm ti anôk bi kƀĭn anei, Khua lăn čar mơĭt truh hŏng phung knuă druh jing kahan ksiêm khua thŭn, phung jhŏng ktang hlăm êpul kahan ksiêm, phung kahan êka êkeh, kahan ruă duam asăp hơêč hmưi, klei mđĭ ai, lehanăn ai tiê hdơr knga prŏng prĭn. Khua lăn čar lač klă, Đảng, Knŭk kna lehanăn phung ƀuôn sang drei srăng hdơr nanao kơ phung jhŏng ktang săn leh asei mlei, phung djiê êngiă, kahan êka êkeh, mnuih mâo bruă tŭ dưn hŏng lăn čar kyua klei hnŭk êngiê kơ djuê ana, rŭ mdơ̆ng, lehanăn răng mgang lăn čar, răng kriê klei êđăp ênang kơ phung ƀuôn sang./.

Y-Khem pô mblang