VOV4.Êđê - Hrue mbrue (12/4), Khua lăn čar Nguyễn Xuân Phúc nao ti anôk bi tuôm hŏng phung duh bi liê kơ dua kdriêk Hŏk Môn lehanăn Củ Chi, ƀuôn prŏng Hồ Chí Minh. Anei jing klei bi kƀĭn hŏng phung duh bi liê prŏng êdi hlăm ala čar mâo truh 550 čô phung bi ala lu jing phung duh mkra. Ti anôk bi kƀĭn, dua kdriêk Củ Chi lehanăn Hŏk Môn hưn mdah leh jih jang klei găl pô, lehanăn mâo klei iêo jak duh bi liê kơ 55 mta bruă, hŏng ênoh prăk duh bi liê jih jang êbeh 285 êbâo êklai prăk kơ dŭm mta bruă mkra êlan klông, lŏ rŭ mjing ƀuôn prŏng, bruă tuh tia, bruă lŏ hma, duh mkra mnia mblei mkăn.

Blŭ hrăm ti anôk bi tuôm, khua lăn čar hơ̆k mơak ƀuh phung duh mkra hriê bi kƀĭn, ƀuăn mâo klei duh bi liê hŏng dua boh kdriêk Củ Chi lehanăn Hŏk Môn, kyuadah anei jing alŭ wăl mâo lu klei găl mđĭ kyar, jing krĭng êngao hŏng Long An, hŏng Bình Dương dưi mkŏ êlan êa lehanăn kbiă nao kơ hnoh krông Sài Gòn. Khua lăn čar Nguyễn Xuân Phúc mtă kơ phung duh bi liê brei mâo bruă ngă mđrĭng hŏng klei blŭ, pral mâo mkra jih jang bruă knuă, lehanăn hngah đuĕ hŏng klei amâo mâo jăk, klei ƀơ̆ng ngăn. Mbĭt hŏng anăn jing ƀuăn răng mgang wăl hdĭp mda, mâo klei đua klam hŏng yang ƀuôn, đru bi răng kriê lehanăn mđĭ lar knhuah gru dhar kreh./.

Y- Khem pô mblang