VOV4.Êđê - Ƀri akŏ thŭn mrâo, aguah hruê 7/2, jing hruê 7 mlan 1 thŭn Nhâm Dần, Khua lăn čar Nguyễn Xuân Phúc nao lehanăn hluê ngă knăm tịch điền ti să Tiên Sơn, wăl krah Duy Tiên, Hà Nam. Ti knăm Tịch điền Đọi Sơn 2022, Khua lăn čar mñă klă, hlăm wưng klei truh mơ̆ng yan adiê ngă, klei ruă tưp, boh nik jing klei ruă Covid 19 hlăm thŭn 2021, bruă lŏ hma, krĭng ƀuôn sang ti ala čar drei sa blư̆ dơ̆ng dưi rơ̆ng kjăp klei mâo djăp mnơ̆ng ƀơ̆ng huă, mjing tur knơ̆ng h’ĭt kjăp kơ klei hdĭp mnuih ƀuôn sang Việt Nam.

Leh kơnăn, Khua lăn čar Nguyễn Xuân Phúc, phung khua kiă kriê Đảng, Knŭk kna, čar Hà Nam mkŏ mjing leh knăm čuh brui mngưi kơ Yang bruă lŏ hma lehanăn Mtao Lê Đại Hành. Thŭn Nhâm Dần 2022 ăt jing wưng bi hdơr 1035 thŭn (987-2022) Mtao Lê Đại Hành wĭt kai lŏ, pŏk knăm m’ak anei hlăm êdei anei./.

H’Nêč pô mblang