VOV4.Êđê- Pô blŭ bi ala mơ̆ng phŭn bruă hŏng tač êngao lê Thị Thu Hằng lač ti anôk blŭ hrăm hŏng phung ngă bruă klei mrâo tlam mbrue (22/9) snei: Khua lăn čar Nguyễn Xuân Phúc srăng bi ala kơ Đảng, kơ knŭk kna nao ti knăm mkŏ mjing klei čang ênuh kơ khua knŭk kna hđăp Japon Shinzo Abe mơ̆ng hrue 25 – 28/9. Bruă khua lăn čar Nguyễn Xuân Phúc bi ala kơ Đảng, Knŭk kna nao hlăm knăm anei bi êdah ai tiê, klei čih yap mơ̆ng khua phung khua kiă kriê lehanăn phung ƀuôn sang Việt Nam hŏng ai tiê lehanăn klei đru mguôp mơ̆ng Khua knŭk kna Japon êlâo dih Shinzo Abe, mtrŭt mđĭ leh klei bi mguôp dua ala čar, yap jing klei bi mguôp kluôm dhuôn mtrŭn agha êlan hĭn plah wah Việt Nam – Japon. Êjai hlăk dôk păn bruă, ayang khua knŭk kna Japon êlâo dih Shinzo Abe mâo leh 4 blư̆ hriê čhưn kơ Việt Nam, kah leh lu ai tiê klei khăp, lehanăn ngă lu bruă mtrŭt mđĭ klei bi mguôp dua ala čar jăk hĭn, hlăm jih jang bruă./.

Pô mblang: Y-Khem Niê