VOV4.Êđê- Tlam mbruê 17/6, ti sang bruă Khua lăn čar, Khua lăn čar Nguyễn Xuân Phúc tŭ drông leh aduôn Khemmani Pholsena, khua hlăm bruă Đảng gưl dlông, khua phŭn bruă, khua kiă kriê adŭ bruă Khua lăn čar Lào. Khua lăn čar Nguyễn Xuân Phúc hơêč hmưi leh anăn yap yuôm bhăn dŭm boh tŭ yuôm bhăn leh anăn kluôm ênŭm mơ̆ng Lào dưi mâo leh hlăm hruê mmông êgao.

Hluê si Khua lăn čar Nguyễn Xuân Phúc, 2 adŭ bruă Khua lăn čar 2 ala čar čiăng mđĭ hĭn klei bi mguôp, kah mbha hŏng lu mta phŭn, klei ngă bruă klă klơ̆ng čiăng mđĭ hnơ̆ng tŭ jăk, đru kčĕ hŏng Khua lăn čar, k’iăng Khua lăn čar, đru hluê ngă mâo boh tŭ dưn dŭm hdră êlan, hdră mtrŭn mơ̆ng 2 Đảng, 2 ala čar. 2 adŭ bruă Khua lăn čar čiăng mtrŭt mđĭ bruă dưn yua kdrăp mrâo mrang mrô čiăng ngă jăk bruă đru kčĕ leh anăn hâo hưn bruă ngă mơ̆ng Khua lăn čar, k’iăng Khua lăn čar, ngă jăk hĭn bruă tŭ drông, đru kơ phung khua gĭt gai ala čar leh anăn khua gĭt gai gưl dlông.

Pô mblang: Y-Ƀel Êban