VOV4.Êđê- Hruê mbruê, 22/2, ti sang bruă Khua lăn čar, Khua lăn čar Nguyễn Xuân Phúc bi tuôm leh hŏng phung khua gĭt gai, phung kreh knhâo leh anăn phung thơ̆ng kơ bruă duh mkra mơ̆ng êpul phung kreh knhâo bruă duh mkra Việt Nam. Hŏng knhuah gru 47 thŭn mkŏ mjing leh anăn đĭ hriê kơ prŏng, Khua lăn čar Nguyễn Xuân Phúc hmăng hmưi êpul phung kreh knhâo bruă duh mkra Việt Nam leh anăn phung kreh knhâo hlăm kluôm ala čiăng nao êlâo sa knhuang hlăm bruă ksiêm duah čiăng lŏ ruh mgaih dŭm klei dôk kpăk mơ̆ng bruă duh mkra leh 35 thŭn mlih mrâo, mơ̆ng anăn tui ngă mâo boh tŭ dưn hdră mtrŭn 13 mơ̆ng Đảng leh anăn klei hmăng hmưi ala čar mdrŏng sah ti thŭn 2045. Êpul phung kreh knhâo bruă duh mkra Việt Nam mkŏ mjing hlăk thŭn 1975. Sa hlăm dŭm mta kñăm mơ̆ng êpul jing mtrŭt mđĭ dŭm bruă đru kčĕ, bi klă leh anăn wĭt lač kơ yang ƀuôn, mâo ênŭm hnơ̆ng čoh čuăn mơ̆ng klei gĭt gai dŭm dhar bruă leh anăn dŭm alŭ wăl. Boh nik nao hgŭm hlăm bruă mkŏ mjing hdră êlan 5 thŭn kơ anăp hluê si hdră mtrŭn mơ̆ng klei kƀĭn kluôm Đảng tal 13.

Pô mblang: Y-Ƀel Êban