VOV4.Êđê- Hlăm mlan 3/2022, Khua lăn čar srăng kiă kriê klei bi kƀĭn tui duah klei duh bi liê kơ kdriêk Củ Chi, Hóc Môn. Anei jing klei anôk bruă duh mkra mnia mblei ƀuôn prŏng Hồ Chí Minh brei thâo ti anôk bi kƀĭn hŏng phung ngă bruă klei mrâo hưn kơ boh klei duh mkra mnia mblei, lehanăn bruă mdrơ̆ng hŏng klei ruă tưp Covid 19 mkŏ mjing leh tlam mbrue (7/3). Ti anôk bi kƀĭn, Khua lăn čar Nguyễn Xuân Phúc srăng mâo klei kiă kriê. Êngao anăn, Knơ̆ng bruă čuăl mkă – rŭ mkra lehanăn knơ̆ng bruă êlan klông dŭ mdiăng ăt srăng hưn mdah lehanăn mâo hdră tă êlan kơ bruă rŭ mkra êlan klông ti Củ Chi, lehanăn Hóc Môn. Lu phung bi ala mơ̆ng phung duh mkra mâo leh klei bi trông hŏng phung khua kiă kriê knơ̆ng bruă sang čư̆ êa ƀuôn prŏng... Nah êngao kơ klei bi kƀĭn lŏ mâo klei rang mdah 55 mta bruă dôk iêo jak klei duh bi liê, lehanăn mâo kơ dŭm bruă mkra mjing boh mơ̆ng bruă lŏ hma hŏng kdrăp mrâo ti dua kdriêk djŏ tuôm kơ djăp bruă nah gŭ, êlan klông, mkra wĭt ƀuôn prŏng, bruă tuh tia, bruă lŏ hma... hŏng ênoh bi liê jih jang tui si tĭng jing 285 êbâo êklai prăk./.

         Pô mblang: Y-Khem Niê