Hlăm brô 2h40 mnĭt tlam hruê 12/7, Knăm drông Khua lăn čar Tô Lâm dưi mkŏ mjing ti Sang mtao hlăm ƀuôn prŏng phŭn Phnôm Pênh hŏng klei gĭt gai mơ̆ng Mtao Nô-rô-đôm Xi-ha-mô-ni. Leh knăm drông, Khua lăn čar Tô Lâm mâo leh klei bi tuôm hŏng mtao Campuchia Nô-rô-đôm Xi-ha-mô-ni. Ăt hlăm tlam hruê 12/7, Khua lăn čar Tô Lâm bi trông leh hŏng Khua kiă kriê Đảng Mnuih ƀuôn sang Campuchia, Khua Thượng viện Campuchia Hun Sen. 

Dua khua kiă kriê bi mni kơ dŭm boh tŭ mâo dua tĭng mâo leh hlăm wưng êgao. Kñăm ba klei bi mjĕ đĭ kyar hĭn hlăm wưng mrâo, dua tĭng tŭ ư pŏk ngă kjăp klei kuôl kă gưl dlông, boh tŭ klei bi tuôm mơ̆ng dua Đảng, mđĭ klei bi tuôm gưl dlông lehanăn dŭm gưl, boh nik mơ̆ng phung khua kiă kriê mda asei lehanăn phung êdam êra dua ala čar, mđĭ lar boh tŭ klei bhiăn mơ̆ng Dhar bruă bi hgŭm Việt Nam – Campuchia hlăm hdră duh mkra,dhar kreh, kreh knhâo lehanăn kdrăp mrâo, Klei kƀĭn bi hgŭm lehanăn mđĭ kyar dŭm čar knông lăn, đru pŏk ngă klei bhiăn bi hgŭm mrâo msĕ si Klei bi tuôm 3 Phŭn bruă hŏng tač êngao Việt Nam – Campuchia – Lào; pŏk mlar hdră bi mjĕ mjuk lehanăn bi hgŭm bi đru hdơ̆ng găp mơ̆ng dŭm anôk bruă čih mkra klei bhiăn, dŭm êpul bruă lehanăn dŭm alŭ wăl dua ala čar. Ăt hlăm mmăt, Mtao Nô-rô-đôm Xi-ha-mô-ni gĭt gai leh Knăm huă čhưn hŏng Khua lăn čar Tô Lâm lehanăn Êpul bi ala gưl dlông mơ̆ng knŭk kna Việt Nam./.