Bi ala kơ phung ala kơ mnuih ƀuôn sang hơêč hmưi kơ Khua lăn čar Tô Lâm mâo Đảng, Bruă kƀĭn ala đăo knang jao bruă klam mrâo, bi êdah klei bi mni kơ boh tŭ êdah êdi mơ̆ng Klei bi kƀĭn tal 7 mrâo êgao, tơdah Bruă kƀĭn ala bi leh sa hnơ̆ng bruă prŏng kơ klei čih mkra hdră bhiăn, bi mklă lu bruă yuôm bhăn mơ̆ng lăn čar. Khua lăn čar Tô Lâm lač, bruă dưi đăo knang, ruah hlăm bruă mrâo jing klei ktưn hưn, ƀiădah ăt jing bruă klam prŏng mơh, bi êdah klei čang hmăng srăng lŏ dơ̆ng mâo klei nao ai, bi trông, mguôp klei blŭ mơ̆ng phung bi ala kơ mnuih ƀuôn sang čiăng bi leh bruă klam mơ̆ng Khua lăn čar, bi leh bruă klam jing pô bi ala kơ yang ƀuôn.

Hlăm klei bi tuôm, Khua lăn čar bi trông hŏng phung bi ala kơ lu bruă klă klơ̆ng msĕ si klei klă mngač hlăm bruă čuăl mkă, si ngă čiăng mđĭ boh tŭ ngă bruă gang mkhư̆ klei pui ƀơ̆ng, đru dŏng; kơ klei kƀah hlăm bruă kriê dlăng êa drao leh anăn kdrăp mnơ̆ng mdrao mgŭn leh anăn lu bruă mâo phung bi ala kơ mnuih ƀuôn sang mđing srăng mâo Bruă kƀĭn ala ksiêm dlăng, bi mklă hlăm klei bi kƀĭn tal 8 kơ anăp.