Khua lăn čar Việt Nam yap nanao Rúsia jing sa hlăm dŭm ala čar hgŭm tal êlâo hlăm bruă bi mguôp hŏng ala tač êngao mơ̆ng pô, mđing nanao kơ jih bruă, lehanăn ƀuh klei Rúsia đĭ kyar hơĭt kjăp. Đảng, Knŭk kna lehanăn mnuih ƀuôn sang Việt Nam čih pioh nanao klei đru mguôp yuôm bhăn mơ̆ng mnuih ƀuôn sang Liên Xô êlâo dih lehanăn mnuih ƀuôn sang Rúsia ară anei kah leh hŏng Việt Nam hlăm klei bi blah sua mă klei êngiê, klei hluh lir lăn čar, lehanăn hlăm klei mlih mrâo ară anei, hgŭm bi rŭ mdơ̆ng, răng mgang klei êđăp ênang lăn čar ară anei.

Khua lăn čar Tô Lâm bi mni ƀuh klei đĭ kyar jăk klei bi mguôp dua nah mâo leh mơ̆ng đưm plah wah Việt Nam lehanăn Rúsia hlăm djăp mta, hơ̆k mơak ƀuh klei duh mkra mnia mblei dua nah mâo klei đĭ kyar. Dua nah ƀŭn lŏ hyuă kjăp hĭn klei bi hgŭm, ngă dŭm bruă mâo leh phŭn agha kjăp mơ̆ng mphŭn hlăm klei duh mkra mnia mblei, klei duh bi liê, bruă êlan klông, bruă hiu čhưn ênguê, lehanăn klei bi mjĕ êrô mnuih ƀuôn sang./.