Aguah mbruê 25/7, Khua lăn čar Tô Lâm drông leh khua Kiă kriê Đảng Nhân dân Campuchia CPP, Khua bruă Bruă Kƀĭn Ala nah dlông Campuchia Hun Sen, Khua knŭk kna Dhŭng Korea Han Duck Soo, Khua phŭn bruă lĭng kahan hđăp leh anăn phung mâo bruă tŭ dưn Algeria Laid Rebiga, Pô đru kčĕ klei êđăp ênang ala čar India Ajit Doval. Hlăm dŭm mmông tŭ drông, Khua gĭt gai dŭm ala čar bi êdah klei hnĭng ênguôt ti anăp klei djiê mơ̆ng Khua gĭt gai Đảng Nguyễn Phú Trọng, mơĭt klei bi juh leh anăn mđĭ ai truh kơ Khua lăn čar Tô Lâm, Khua gĭt gai Đảng, knŭk kna leh anăn mnuih ƀuôn sang Việt Nam.

Khua gĭt gai dŭm ala čar mpŭ kơ klei sa ai hŏng klei đru mguôp yuôm bhăn mơ̆ng Khua gĭt gai Đảng Nguyễn Phú Trọng kơ klei mđĭ kyar klei mjĕ giăm dua tĭng plah wah Việt Nam leh anăn dŭm ala čar, đăo knang Khua lăn čar Tô Lâm leh anăn khua gĭt gai Việt Nam ba lăn čar Việt Nam lŏ dơ̆ng đĭ kyar, lŏ čuê dŭm klei yuôm bhăn mâo mơ̆ng Khua gĭt gai Đảng Nguyễn Phú Trọng. Khua lăn čar Tô Lâm lač jăk kơ klei bi juh mđĭ ai mơ̆ng knŭk kna, Bruă Kƀĭn Ala, mnuih ƀuôn sang leh anăn khua gĭt gai dŭm ala čar brei leh kơ Khua gĭt gai Đảng Nguyễn Phú Trọng, ăt msĕ mơh klei hrăm mbĭt hŏng phung khua gĭt gai leh anăn mnuih ƀuôn sang hlăm mmông ênguôt hnĭng, bi êdah klei bi mguôp kluôm êlam plah wah Việt Nam hŏng dŭm lăn čar.