Khua lăn čar Tô Lâm drông êpul Phung êdam êra ba anăp hđăp Việt Nam
Thứ ba, 09:45, 16/07/2024
VOV TAYNGUYEN
VOV TAYNGUYEN
VOV4.Êđê- Ƀri gưl bi hdơr 74 thŭn Hruê knhuah gru phung êdam êra ba anăp Việt Nam (15/7/1950 - 15/7/2024), tlam 15/7, ti Anôk bruă khua lăn čar, Khua lăn čar Tô Lâm bi tuôm leh hŏng êpul bi ala Êpul hgŭm Phung êdam êra ba anăp hđăp Việt Nam ƀri gưl nao hlăm Klei bi kƀĭn phung knuă druh kluôm ala Êpul hgŭm Phung êdam êra ba anăp hđăp Việt Nam.
Khua lăn čar mơĭt kơ phung êdam êra ba anăp, jih jang phung hlăm kluôm ala hdĭp mơak, suaih asei mlei, lŏ dơ̆ng lar bra ktang ai tiê “êdam êra ba anăp” hlăm klei mkŏ mjing čar kwar Việt Nam. Ƀri gưl Êpul hgŭm mprăp kơ Klei bi kƀĭn phung bi ala kluôm ala Êpul hgŭm Phung êdam êra ba anăp hđăp Việt Nam tal V, wưng 2024-2029, Khua lăn čar mtă kơ phung êdam êra hdơr leh anăn gĭr jih ai tiê hlue ngă klei Awa mtă mtăn.
Khua lăn čar čang hmăng phung hlăm êpul mâo lu bruă ngă klă sĭt hĭn čiăng hnưm msir mgaih dŭm bruă adôk mâo hlăm bruă phung êdam êra ba anăp, dlăng anăn jing bruă klam, klei khăp, bi êdah ai tiê hdơr knga êlam hŏng phung duh myơr, săn asei kơ bruă mtlaih êngiê djuê ana, hluh lir lăn čar, mkŏ mjing leh anăn răng mgang čar kwar.
Viết bình luận