Khua lăn čar Tô Lâm lač jăk kơ Êpul khua bruă Đảng gưl dlông, knŭk kna, Bruă Kƀĭn Ala leh anăn mặt trận čar kwar Lào mâo leh asăp bi juh kơ klei Khua gĭt gai Đảng Nguyễn Phú Trọng djiê, ngă klei čang ênuh gưl ala čar dua hruê leh anăn tiŏ nao êpul bi ala gưl dlông mơ̆ng Khua gĭt gai Đảng, Khua lăn čar ba anăp hriê hlăm knăm čang ênuh, bi êdah klei bi hgŭm, bi mguôp siă suôr, hrăm mbĭt plah wah dua Đảng, dua lăn čar leh anăn mnuih ƀuôn sang dua lăn čar.

Khua lăn čar Tô Lâm mñă klă, hlăm djăp bruă ngă, Khua gĭt gai Đảng Nguyễn Phú Trọng dlăng yuôm mrô 1, mâo klei uêñ mĭn, bi mguôp hŏng bruă cách mạng Lào, jĕ giăm hŏng phung khua gĭt gai Lào, hlăm anăn mâo khua gĭt gai Thongloun Sisoulith, mâo nanao klei uêñ mĭn, ksul mbŭ kơ klei mjĕ giăm, klei bi hgŭm  plah wah 3 Đảng, 3 lăn čar leh anăn mnuih ƀuôn sang tlâo lăn čar Việt Nam - Lào – Campuchia, anăn anăn jing klei yuôm bhăn, jing hdră bhiăn hdĭp, mta yuôm bhăn mrô sa hŏng klei êđăp ênang, mđĭ kyar mơ̆ng grăp lăn čar.