Hlăm mmông tŭ drông, Khua lăn čar Tô Lâm bi êdah klei hơ̆k mơak gưl tal êlâo bi tuôm hŏng phung bi ala Eu hlăm bruă păn mrâo, lač jăk kơ dŭm klei hơêč hmưi jăk siam hĭn mơ̆ng khua gĭt gai gưl dlông Eu leh anăn dŭm ala čar hgŭm hŏng phung bi ala.

Khua lăn čar mñă klă Eu leh anăn dŭm ala čar Hgŭm jing ƀĭng hgŭm yuôm bhăn mơ̆ng Việt Nam, hmăng hmưi phung bi ala srăng jing kdrông mkŏ yuôm bhăn, đru mguôp lu hĭn hlăm klei bi hgŭm, bi mguôp kluôm dhuôm plah wah Việt Nam leh anăn EU leh anăn dŭm ala čar hgŭm hlăm wưng kơ anăp, đru hnưm ba klei bi mguôp Việt Nam –Eu đĭ ti hnơ̆ng mrâo. Khua lăn čar ăt mñă kơ phung bi ala lŏ dơ̆ng mtrŭt mđĭ klei bi trông êpul dŭm gưl leh anăn mâo klei mtrŭt mjhar dŭm ala čar EU ka bi klă klei kuôl kă rơ̆ng kơ klei duh bi liê Việt Nam – EU (EVIPA) hnưm bi klă klei kuôl kă leh anăn Dhar bruă Ơrôp EC hnưm lui hĕ hră kñĭ IUU hŏng kan hdang mơ̆ng Việt Nam, đru kơ Việt Nam mđĭ kyar bruă duh mkra êa ksĭ, rông kan hdang hŏng klei kjăp.