Hlăm mmông tŭ drông, Khua lăn čar Tô Lâm bi êdah klei nao ai ti anăp klei đĭ kyar tŭ dưn leh anăn kluôm êlam hlăm klei mjĕ giăm bi mguôp hdră êlan Việt Nam – Angle. Kñăm bi lar tur knơ̆ng bi mguôp jăk siam plah wah Việt Nam leh anăn Angle hlăm wưng kơ anăp, Khua lăn čar Tô Lâm mñă kơ dua tĭng mđĭ hĭn klei bi trông êpul leh anăn bi tuôm dŭm gưl, mtrŭt mđĭ klei bi mguôp bruă lĭng kahan – răng mgang klei êđăp ênang, mkŏ mjing klei găl kơ klei bi mguôp duh mkra mnia mblei plah wah knơ̆ng bruă dua lăn čar.

Khua lăn čar Tô Lâm bi myuôm boh tŭ klei bi mguôp jăk siam plah wah dua ala čar hlăm bruă mtô mjuăt bi hriăm êjai ƀrư̆ hruê ƀrư̆ mâo lu phung hriăm gưl prŏng, hđeh sang hră Việt Nam hriăm ti Angle leh anăn mâo lu bruă bi mguôp plah wah dŭm sang hră gưl prŏng leh anăn anôk bruă mtô mjuăt bi hriăm dua ala čar, mbĭt anăn hmăng hmưi dua tĭng lŏ dơ̆ng ngă bruă bi mguôp lu mta, lu jơr kơ dhar kreh, hiu čhưn ênguê, mtô mjuăt bi hriăm čiăng mđĭ hĭn klei bi thâo kơ hdơ̆ng pô.