Blŭ hrăm hlăm klei kƀĭn, Khua lăn čar lač klă, mlih mrâo hdră bhiăn jing sa hlăm dŭm mta phŭn yuôm bhăn hlăm hdră êlan mlih mrâo mơ̆ng Đảng, čiăng đru mkŏ mjing leh anăn bi kuôl ala čar yang ƀuôn ngă phŭn Việt Nam, đru rơ̆ng hluê ngă hdră bhiăn klei dưi knŭk kna jing hluh hlir, mâo klei bi mbha klă sĭt, bi mguôp kjăp, ksiêm dlăng tŭ dưn plah wah dŭm anôk bruă knŭk kna hlăm bruă hluê ngă hdră bhiăn, răng mgang klei sĭt nik, klei dưi êngiê anak mnuih, klei dưi mnuih ƀuôn sang, boh tŭ dưn mơ̆ng lăn čar, êpul êya leh anăn grăp čô.

Hlăm wưng anăn, bruă hdră bhiăn leh anăn mkra mlih hdră bhiăn čiăng lŏ dưi mtrŭt mđĭ, hŏng klei gĭt kđi čar, mâo klei hriăm găl guôp, bi lar ai ktang mơ̆ng dŭm gưl, dŭm dhar bruă mơ̆ng gưl dlông truh kơ alŭ wăl leh anăn yang ƀuôn, gĭr tui tiŏ mta kñăm, hdră tă mâo leh čiăng djăp ênŭm hnơ̆ng čuăn, klei čiăng hlăm wưng mrâo.