Leh hmư̆ phung khua kiă kriê dŭm Phŭn, dhar bruă blŭ hlak mblang dŭm klei akâo čiăng mơ̆ng alŭ wăl, Khua lăn čar Tô Lâm lač klă, Cao Bằng jing alŭ wăl mâo bruă klam yuôm bhăn, jing “ƀăng jang” nah Yŭ lehanăn Dưr mơ̆ng ala čar, mâo lu lăn mnga êa mơak siam, dôk hrông mơ̆ng hđăp đưm, mâo 27 djuê ana hdĭp mda hŏng lu knhuah dhar kreh jăk siam, jiă knhuah djuê ana.

Čiăng hluê ngă tŭ dưn bruă klam hlăm wưng ti anăp, Khua lăn čar mtă kơ Cao Bằng brei sa ai, hrăm mbĭt ngă bruă, krŭ wĭt klei čang hmăng kpưn đĭ, ai tiê hgŭm mguôp, ktưn hưn djuê ana, mđĭ lar ai ktang mlih mrâo, klei găl mâo mơ̆ng čar, knhuah gru hƀuê ênuk, dhar kreh, anak mnuih mơ̆ng krĭng lăn “Phŭn mơ̆ng cách mạng”; amâo čang guôn, jưh knang đei, ƀiădah brei čŏng pô kpưn đĭ, gĭr hluê ngă tŭ dưn hdră kčah mđĭ kyar bruă duh mkra – ala ƀuôn wưng thŭn 2021-2025.