Blŭ hlăm mmông mă bruă, Khua lăn čar Tô Lâm mơĭt klei êmuh hrăm, klei hơêč hmưi jăk siam hĭn mơ̆ng Khua gĭt gai Đảng Nguyễn Phú Trọng kơ jih jang phung knuă druh, lĭng kahan êa. Khua lăn čar mñă kơ Knơ̆ng gĭt gai kahan êa čiăng thâo săng klă kơ bruă klam, kơhưm yuôm bhăn mơ̆ng kahan êa hlăm bruă răng mgnag klei êđăp ênang lăn čar hlăm boh klei mrâo.

Knơ̆ng gĭt gai kahan êa čiăng kñăm hluê ngă tŭ dưn hdră mtrŭn mrô 44 gưl 13 kơ hdră êlan răng mgang răng čar hlăm wưng mrâo, boh nik jing klei mĭn, klei thâo săng mrâo kơ bruă răng mgang lăn čar, hyuă kjăp klei mĭn “ktang phĭt, gĭr ktưn, bi kdơ̆ng čiăng răng mgang klei êngiê, klei dưi kiă kriê, hluh hlir lăn čar, êa ksĭ, plao ksĭ, wăl adiê, răng mgang wăl êđăp ênang, hơĭt kjăp čiăng mđĭ kyar lăn čar” mâo nanao klei răng, thâo klă phung mâo klei mĭn roh, ktang phĭt, gĭr ktưn hluê ngă bruă klam răng mgang plao ksĭ, êa ksĭ lăn čar.