Blŭ hrăm hlăm knăm anăn, Khua lăn čar Tô Lâm bi êdah klei hơ̆k mơak wĭt nao čuă anôk hing ang Pắc Bó nao mbĭt hŏng Awa Hồ, nao mbĭt hŏng hƀuê ênuk cách mạng mơ̆ng Đảng, knŭk kna, mbĭt anăn dưi ktuê dlăng dŭm klei mlih hlăm klei hdĭp mnuih ƀuôn sang tinei, dưi ktuê dlăng dŭm bruă mkŏ mkra, dŭm hdră kñăm mơ̆ng čar ba wĭt leh boh tŭ dưn, đru mđĭ klei hdĭp mnuih ƀuôn sang alŭ wăl.

Khua lăn čar yap yuôm bhăn kdriêk Hà Quảng hlăm dŭm thŭn êgao kñăm mđĭ kyar bruă duh mkra ala ƀuôn, răng mgang klei êđăp ênang leh anăn rơ̆ng hơĭt klei hdĭp mnuih ƀuôn sang. Khua lăn čar lač klă, ênuk Awa Hồ dôk hdĭp uêñ mĭn nanao kơ bruă kriê dlăng phung mda asei, boh nik jing phunh hđeh điêt…leh anăn anei jing bruă klam mâo Đảng, knŭk kna uêñ mĭn čiăng kơ jih jang phung hđeh dưi nao sang hră mơar, dưi dưn boh tŭ mơ̆ng cách mạng. Kyuanăn bruă mđĭ hnơ̆ng mtô mjuăt bi hriăm, mtô mjuăt jing yuôm bhăn êdi, hlăm anăn čiăng uêñ mĭn mtam mơ̆ng gưl hriăm hđeh điêt.