VOV4.Êđê- Ti sang bruă Khua lăn čar, Khua lăn čar Nguyễn Xuân Phúc tŭ drông leh khua kiă kriê anôk bruă ksiêm dlăng ala čar Russia Igor Krasnov dôk mâo klei hriê čuă leh anăn mă bruă ti Việt Nam mơ̆ng hruê 4 - 6/10. Hlăm mmông tŭ drông, Khua lăn čar Nguyễn Xuân Phúc lač klă, Việt Nam yap yuôm bhăn, hdơr nanao kơ klei đru prŏng prĭn mơ̆ng Liên Xô êlâo dih, jing ala čar Russia ară anei leh anăn gĭr ktưn ksul mbŭ kơ klei bi mguôp hdră êlan kluôm ênŭm hŏng Russia amâo mâo mdei mđĭ kyar.

Hlăm gưl hruê čuă anei, khua kiă kriê anôk bruă ksiêm dlăng ala čar Russia Igor Krasnov đăo knang, hŏng klei bi mguôp amâo mâo mdei, 2 tĭng srăng lŏ mâo lu boh tŭ dưn hlăm bruă gang mkhư̆ phung ngă soh, đru hlăm bruă rơ̆ng klei êđăp ênang ala čar, klei êđăp ênang yang ƀuôn mơ̆ng grăp ala čar leh anăn amâo mâo mdei ksul mbŭ kơ klei mjĕ giăm Việt Nam – Russia.

 Pô mblang: Y-Ƀel Êban