VOV4.Êđê- Tlam mbruê 22/8, ti sang bruă Khua lăn čar, Khua lăn čar Nguyễn Xuân Phúc tŭ drông leh khua kiă kriê sang phat kđi gưl dlông ala čar Lào Xayxana Khotphouthone leh anăn êpul ngă bruă hriê čuă, mă bruă ti Việt Nam. Hlăm mmông tŭ drông, Khua lăn čar Nguyễn Xuân Phúc bi mni kơ Xayxana Khotphouthone leh anăn êpul ngă bruă mâo klei hriê čuă, mă bruă, nao hlăm klei kƀĭn trông anôk bruă phat kđi dŭm čar mâo êlan knông lăn mbĭt Việt Nam – Lào gưl tal 7 leh anăn dŭm mta bruă tŭ drông thŭn bi mguôp plah wah Việt Nam – Lào, Lào - Việt Nam thŭn 2022.

Yap yuôm bhăn anôk bruă phat kđi gưl dlông 2 ala čar mâo klei mjĕ giăm, klei bi mguôp jăk siam, Khua lăn čar lač, anei jing klei găl đru kơ 2 tĭng kah mbha klei hưn leh anăn klei thâo hlăm dŭm mta bruă klei bhiăn, mbĭt anăn mñă klă: Việt Nam mprăp klei đru kơ anôk bruă phat kđi gưl dlông Lào kơ djăp mta bruă, mprăp mkăp brei klei đru hriăm kơ phung knuă druh anôk bruă phat kđi gưl dlông Lào hriê hriăm ti Việt Nam.

Pô mblang: Y-Ƀel Êban