VOV4.Êđê - Tlam mbruê 16/9, ti sang bruă Khua lăn čar, Khua lăn čar Nguyễn Xuân Phúc tŭ drông leh phung kreh knhâo mơ̆ng tar rŏng lăn nao hlăm klei kƀĭn trông “Klei kreh knhâo, knhuah hdĭp leh anăn mđĭ kyar anak mnuih” ti Bình Định hlăm hdră “Bi tuôm Việt Nam” gưl tal 18.

Bi ala kơ knŭk kna leh anăn mnuih ƀuôn sang Việt Nam, Khua lăn čar Nguyễn Xuân Phúc tŭ drông 51 čô kreh knhâo hriê hgŭm hlăm klei kƀĭn anei, mâo klei thâo ngă bruă đru kơ ala čar leh anăn tar rŏng lăn. Mbĭt anăn, Khua lăn čar yap tuôm bhăn klei bi mguôp mkŏ mjing tŭ jing klei kƀĭn mơ̆ng hdră “Bi tuôm Việt Nam” hŏng Êpul hgŭm bruă kƀĭn ala tar rŏng lăn, Phŭn bruă kreh knhâo leh anăn mrâo mrang, čar Bình Định, anôk bruă ksiêm duah mđĭ kyar mơ̆ng Prăng ti Việt Nam. Klei kƀĭn jing sa mta bruă yuôm bhăn hlăm dŭm mta bruă ngă mơ̆ng Êpul hgŭm lu ala čar bi klă ti knhal jih thŭn 2021 leh anăn UNESCO bi klă hlăk mlan 7 thŭn 2022.

Y-Ƀel pô mblang