VOV4.Êđê- Tlam mbruê 11/2, ti sang bruă Khua lăn čar, Khua lăn čar Nguyễn Xuân Phúc tŭ drông leh pô bi ala mơ̆ng Mi leh anăn pô bi ala mơ̆ng Mexico ba mdah hră bi ala kơ ala čar. Tŭ drông pô bi ala mơ̆ng Mi, Marc Evans Knapper ba mdah hră bi ala kơ ala čar, Khua lăn čar Nguyễn Xuân Phúc tŭ drông pô bi ala mâo Khua mil čhil Joe Biden jao bruă klam leh anăn tŭ drông wĭt kơ ƀuôn prŏng phŭn Hà Nội. Khua lăn čar yap yuôm bhăn kyua pô bi ala mơ̆ng Mi mâo klei đru mguôp kơ klei mjĕ giăm 2 ala čar hlăm wưng thŭn 2004 – 2007.

Khua lăn čar đăo knang hlăm wưng păn bruă ti Việt Nam, pô bi ala srăng lŏ đru mguôp lu hĭn hlăm bruă mtrŭt mđĭ klei mjĕ giăm 2 ala čar. Tŭ drông pô bi ala mơ̆ng Mexico ba mdah hră bi ala kơ ala čar, Khua lăn čar Nguyễn Xuân Phúc hơêč hmưi kơ pô bi ala Alejandro Negrin Munoz dưi ruah mdưm jing pô bi ala mâo ênŭm klei dưi mơ̆ng Mexico ti Việt Nam, mbĭt anăn đăo knang kơ pô bi ala hŏng klei thâo bruă pô hlăm bruă hŏng tač êngao srăng bi leh jăk wưng păn bruă, đru mguôp hlăm klei đĭ kyar knhuah gru bi mguôp lu mta bruă pla wah 2 ala čar.

Pô mblang: Y-Ƀel Êban