Ti knăm anei, dua khua kiă kriê bi mni klei đĭ kyar mơ̆ng klei bi mjĕ dua nah hlăm wưng êgao, boh nik leh mkra mđĭ jing Ƀĭng hgŭm phŭn thŭn 2015. Klei bi mjĕ hlăm hdră kđi čar, hŏng tač êngao ƀrư̆ hruê dưi bi kjăp hluê hdră krơ̆ng kjăp dŭm gưl bi tuôm, bi trông êpul gưl dlông lehanăn dŭm gưl, dŭm klei bhiăn hgŭm bruă dua nah dưi pŏk ngă tŭ dưn.

Kơ hdră êlan mđĭ kyar klei bi mjĕ mơ̆ng dua ala čar hlăm wưng ti anăp, dua khua kiă kriê tŭ ư mđĭ hĭn hdră bi hgŭm hlăm bruă kđi čar, hŏng tač êngao hluê hdtă bi trông lehanăn bi tuôm ti dŭm gưl, bi hgŭm mkŏ mkra Hdră ngă bruă ƀĭng hgŭm phŭn wưng thŭn 2025-2030. Kơ boh klei ti Êa ksĭ Ngŏ, dua tĭng ƀuăn krơ̆ng kjăp lehanăn mtrŭt mđĭ klei êđăp ênang, h’ĭt kjăp lehanăn klei êngiê êlan êa lehanăn êlan phiơr, iêu mthưr dŭm tĭng gĭr ư̆ ăn, amâo arưp ba yua ai ktang amâo dah yua phao ktuang, mpŭ djăp ênŭm kơ hdră hŏng tač êngao, msir mghaih klei bi kuan hŏng hdră êđăp ênang, mpŭ kơ hdră bhiăn hluê djŏ klei bhiăn tar rŏng lăn, hlăm anăn mâo Klei kuôl kă Hdră bhiăn Êa ksĭ thŭn 1982 (UNCLOS).