Blŭ hrăm ti anôk bi tuôm anăn, khua lăn čar Võ Văn Thưởng hưn mthâo klah čŭn kơ boh klei hlăm lăn čar thŭn 2023, yap jing thŭn dơ̆ng ruĕ kơ klei hlue ngă hdră mtrŭn klei bi kƀĭn prŏng Đảng 13, lehanăn wưng knhal tuič hlăm bruă duh mkra ala ƀuôn 5 thŭn.

Khădah boh klei hlăm alŭ wăl lehanăn tar rŏng lăn dôk găn lu klei dleh dlan rŭng răng, mâo klei bi dleh kpăk hlăm bruă duh mkra mnia mblei, ƀiădah hlăm klei gĭrr mơ̆ng kluôm Đảng, jih jang mnuih ƀuôn sang lehanăn lĭng kahan lăn čar ăt mâo ba wĭt leh lu klei tŭ dưn yuôm bhăn, jing gru kruak êdah êdi. Lač kơ dŭm bruă mkăn mnuih ƀuôn sang mâo klei mđing, Khua lăn čar brei thâo, ƀuôn prŏng Đà Nẵng mghaih msir jih djăp klei mnuih ƀuôn sang akâo wưng leh êgao. Siămdah, mâo đa đa boh klei knŏng ƀuôn prŏng đuič mghaih msir, kñăm mâo klei bi mguôp mbĭt hŏng dŭm anôk bruă nah dlông bi leh klei bhiăn mă bruă.