Hlue si asăp jak iêo mơ̆ng bruă Đảng gưl dlông drei, Êpul khua prŏng Đảng Cộng sản Cuba mâo Roberto Morales Ojeda, djă akŏ lehanăn hriê čhưn ti ala čar Việt Nam lehanăn hrăm mbĭt kiă kriê klei bi trông tal 5, plah wah dua Đảng, mơ̆ng hruê  30/4 - 4/5/2023.

Khua lăn čar Võ Văn Thưởng bi mni kơ klei hgŭm mbĭt jăk siam dua Đảng, dua ala čar hlăm dŭm thŭn êgao, bi klă Việt Nam ăt sa ai lehanăn bi đru nanao čiăng dưi găn jih jang klei dleh dlan, klei lông dlăng kyua klei kăm mkhư̆, lehanăn mghaih msir boh mơ̆ng klei yan adiê ngă, đăo knang kơ Đảng, Knŭk kna lehanăn mnuih ƀuôn sang Cuba srăng ba wĭt boh tŭ dưn prŏng hlăm bruă răng mgang boh mơ̆ng cách mạng, rŭ mdơ̆ng yang ƀuôn ngă phŭn hlăm lăn čar plao ksĭ anei. Khua lăn čar čang hmăng kơ dua nah lŏ dơ̆ng bi hgŭm kjăp hĭn hlăm djăp mta bruă, bi đru hlăm anôk bi kƀĭn hŏng ala tač êngao, hgŭm kjăp hlăm dŭm bruă dua nah mâo klei găl./.