Tlam mbruê 24/5, tŭ drông phung bi ala dŭm ala čar Qatar, Brazil, Slovenia, Portugal, Estonia leh anăn Guinea hriê ba hră hưn ba mdah păn ngă bruă klam ti Việt Nam, Khua lăn čar Võ Văn Thưởng mñă klă, dŭm anôk bruă djŏ tuôm ti Việt Nam srăng mkŏ mjing klei găl čiăng kơ phung bi ala mtrŭt mđĭ bi mguôp 2 tĭng hŏng Việt Nam ƀrư̆ hruê ƀrư̆ đĭ kyar ktang. Tŭ drông pô bi ala Qatar Khalid Ali Abdullah Abel,, Khua lăn čar hơ̆k mơak kơ klei bi hgŭm, bi mguôp plah wah 2 ala čar mâo klei đĭ kyar jăk, jêñ jêñ mkŏ mjing klei bi trông dŭm gưl, giăm anei jing gưl nao čuă ala čar Quata mơ̆ng k’iăng Khua lăn čar Võ Thị Ánh Xuân (5/2023). Khua lăn čar mñă kơ pô bi ala hlăm wưng păn bruă srăng mtrŭt mđĭ klei mjĕ giăm 2 ala čar hlăm djăp mta bruă leh anăn bi êdah klei hmăng hmưi hnưm tŭ drông Mtao Qatar Sheikh Tamim bin Hamad Al-Thani hriê čuă Việt Nam hlăm thŭn 2023.

Tŭ drông pô bi ala Brazil Marco Farani, Khua lăn čar Võ Văn Thưởng mñă klă, Việt Nam dlăng yuôm bhăn leh anăn hmăng hmưi mđĭ hĭn klei bi mguôp kluôm dhuôm hŏng Brazil. Hlăm dŭm mông tŭ drông, Khua lăn čar Võ Văn Thưởng lač jăk leh anăn yap yuôm bhăn dŭm ala čar sa ai hŏng klei mĭn ASEAN leh anăn Việt Nam kơ boh klei ksĭ Ngŏ, mgaih msir dŭm amâo thâo bi djŏ hŏng dŭm hdră êlan êđăp ênang hluê si klei mpŭ kơ klei bhiăn ala čar, boh nik jing Unclos 1982, răng mgang klei êđăp ênang, klei êngiê dŭ mdiăng êlan êa ksĭ leh anăn êlan êdeh phiơr, rơ̆ng klei êđăp ênang, hơĭt kjăp leh anăn mđĭ yar alŭ wăl.